★★★★★★★★☆☆
Starring: Taron Egerton, Colin Firth, Samuel L. Jackson
Genre: Action, Adventure, Comedy
Runtime: 129 minutes
Director: Matthew Vaughn
Writer: Jane Goldman, Matthew Vaughn, Mark Millar (comics), Dave Gibbons (comics)
Production: 20th Century Fox, Marv Films, Cloudy Productions,
TSG Entertainment
Country: UK
Nang mamatay ang ama sa isang secret mission sa Middle East ay nagsimulang mabago ang magandang buhay ng batang si Gary "Eggsy" Unwin (Taron Egerton). Matapos ang labing-pitong taon ay isa na siya ngayong binata na hindi nakapagtapos, walang trabaho at nakatira kasama ang ina sa bahay ng kaniyang mapang-abusong stepfather. Nang minsang mahuli ng pulis at mangailangan ng tulong ay tinawagan ni Eggsy ang isang numero na naka-ukit sa medalyang ibinigay sa kaniya noong bata pa ni Harry Hart (Colin Firth), ang dating kasamahan ng kaniyang ama sa trabaho.
Pagkatanggap ng tawag ay agad tinulungan ni Hart si Eggsy. Sa muling pagkikita ng dalawa ay ipinaalam na ni Hart kay Eggsy ang tungkol sa Kingsman, isang sikretong organisasyon kung saan siya kasalukuyang nagtatrabaho at dati ng kaniyang pumanaw na ama. Sa hindi inaasahang pagkamatay ng isa sa kanilang agent na si Lancelot ay nangangailangan ngayon ang Kingsman ng papalit sa iniwan nitong puwesto. Sa nakitang kakayahan ni Eggsy, sinubukan siyang kumbinsihin ni Hart na mag-apply at kumatawan bilang kandidato niya sa darating na pagpili sa bagong agent na papalit sa puwesto ni Lancelot.
